Nydeleg føre

Med eit greit lag nysnø og ei minusgrad var føret upåklageleg. Løypene var preparerte og det var også nok snø til å gå i terrenget. Vi var ikkje åleine om å reise til Brekko denne laurdagen, det var nok ein del andre som også lengta litt etter snøen.

Etter å først ha tusla litt rundt i lysløypa, tok vi turen opp Langedalen til Kartavatnet. Dette er ein fin avstikkar frå dei preparerte løypene. Det var flott å koma litt opp i høgda og gå i den fine nysnøen. Litt lite snø var det dog enkelte parti, men dette var uproblematisk. Sommartrasèen blir stort sett fulgt.

Etter avslappingspause med nistepakka, vart det litt skigåing i dei preparerte løypene. Med litt diverse skismurningsrestar under skia, så vart det ikkje den heilt store glien, men artig var det likevel.

Nokre bilde frå skigåinga under. Fleire i albumet opp til høgre.


Brekko

Det trengs ikkje så mykje snø i Brekko før det blir fine langrennsforhold, 10-15cm er somregel nok og difor er det ofte greie forhold her. Jæren friluftsråd er flinke med å preparere og kjøre opp spor så fort det er snø nok. Nærleiken til Jæren og Stavanger gjer at Brekko til ein populær stad for skitrening. Dei 6 kilometrane med lysløyper har lys fram til 22.00 kvar dag og ein kveldstur kan anbefalast. Det er også 2 store parkeringsplassar som tar unna sjølv på utfartsdagar (20kr for parkering, går til drift av området). Frå den øvre parkeringsplassen er det bare å spenne på seg skia og gå rett ut i løypene. God tur!

Turdato: 22.01.2005